Maa-Baap ne Bhulso Nahi – મા – બાપને ભૂલશો નહિ..

ભૂલો ભલે બીજું બધું મા – બાપ ને ભૂલશો નહિ,

અગણિત છે ઉપકાર એના, એહ વિસરશો નહિ,

પત્થર પૂજ્યા પૃથ્વી તણાં, ત્યારે દીઠું તમ મુખડું,

એ પુનિત જનના કાળજાં, પત્થર બની છૂંદશો નહિ.

કાઢી મુખેથી કોળીયા, મ્હોંમાં દઇ મોટા કર્યાં,

અમૃત તણાં દેનાર સામે, ઝેર ઉગળશો નહિ.

લાખો લડાવ્યા લાડ તમને, કોડ સૌ પૂરા કર્યાં,

એ કોડના પૂરનાર ના, કોડ પૂરવા ભૂલશો નહિ.

લાખો કમાતા હો ભલે, મા – બાપ જેથી ના ઠર્યાં,

એ લાખ નહિ પણ રાખ છે, એ માનવું ભૂલશો નહિ.

સંતાનથી સેવા ચાહો, તો સંતાન બની સેવા કરો,

જેવું કરો તેવું ભરો, એ ભાવના ભૂલશો નહિ.

Also Read: એક મનોરથ એવો છે…

ભીને સૂઇ પોતે અને સૂકે સૂવડાવ્યાં આપને,

એ અમીમય આંખને, ભૂલીને ભીંજવશો નહિ.

પુષ્પો બીછાવ્યાં પ્રેમથી, જેણે તમારા રાહ પર,

એ રાહબરનાં રાહ પર, કંટક કદી બનશો નહિ.

ધન ખરચતાં મળશે બઘું, માતા – પિતા મળશે નહિ,

પલ પલ પુનિત એ ચરણની ચાહના ભૂલશો નહિ.