શ્રી શત્રુંજયના દુહા
સિદ્ધાચલ સમરું સદા, સોરઠ દેશ મોઝાર ;
મનુષ્ય જન્મ પામી કરી, વંદુ વાર હજાર. 1
સોરઠ દેશમાં સંચર્યો, ન ચઢ્યો ગઢ ગિરનાર ;
શેત્રુંજી નદીએ નાહ્યો નહીં, એનો એળે ગયો અવતાર. 2
શેત્રુંજી નદીએ નાહીને, મુખબાંધી મુખકોશ ;
દેવ યુગાદિ પૂજીએ, આણી મન સંતોષ.. 3
એકેકું ડગલું ભરે, શેત્રુંજા સામું જેહ ;
ઋષભ કહે ભવ ક્રોડનાં, કર્મ ખપાવે તેહ.. 4
શેત્રુંજા સમો તીરથ નહિ, ઋષભ સમો નહિ દેવ ;
ગૌતમ સરિખા ગુરુ નહિ, વળી વળી વંદુ તેહ.. 5
જગમાં તીરથ દો વડા, શત્રુંજય ગિરનાર ;
એક ગઢ ઋષભ સમોસર્યા, એક ગઢ નેમકુમાર.. 6
સિદ્ધાચલ સિદ્ધિ વર્યા, મુનિવર કોડી અનંત ;
આગે અનંતા સિદ્ધશે, પૂજો ભવિ ભગવંત.. 7
શત્રુંજય ગિરિ – મંડણો, મરુદેવાનો નંદ ;
યુગલાધર્મ નિવારણો, નમો યુગાદિ જિણંદ.. 8
તન મન ધન સુત વલ્લભા, સ્વર્ગાદિ સુખ ભોગ ;
વળી વળી એ ગિરિવંદતા, શિવરમણી સંયોગ.. 9
શ્રી શત્રુંજયનું ચૈત્યવંદન
શ્રી શત્રુંજય સિદ્ધક્ષેત્ર, દીઠે દુર્ગતિ વારે ;
ભાવ ધરીને જે ચઢે, તેને ભવ પાર ઉતારે.. 1
અનંત સિદ્ધનો એહ ઠામ, સકલ તીર્થનો રાય,
પૂર્વ નવાણું ઋષભદેવ, જ્યાં ઠવિયા પ્રભુ પાય… 2
સૂરજકુંડ સોહામણો, કવડ – જક્ષ અભિરામ,
નાભિરાયા કુલ – મંડણો, જિનવર કરું પ્રણામ… 3
શ્રી શત્રુંજયનું સ્તવન
વિમલાચલ નિતુ વંદીએ, કીજે એહની સેવા,
માનું હાથ એ ધર્મનો, શિવતરું ફળ લેવા.. વિમલા0.. 1
ઉજ્જવલ જિનગૃહ મંડલી, તિહાં દીપે ઉતંગા ;
માનું હિમગિરિ વિભ્રમે, આઇ અંબર ગંગા… વિમલા0.. 2
કોઇ અનેરું જગ નહિ, એ તીરથ તોલે ;
એમ શ્રીમુખ હરિ આગળે, શ્રી સીમંધર બોલે.. વિમલા0… 3
જે સઘળાં તીરથ કહ્યાં, યાત્રા ફળ કહિએ ;
તેહથી એ ગિરિ ભેટતાં, શતગણું ફળ લહિએ.. વિમલા0… 4
જન્મ સફળ હોય તેહનો, જે એ ગિરિ વંદે ;
સુજસવિજય સંપદ લહે, તે નર ચિર નંદે.. વિમલા0… 5
શ્રી શત્રુંજયની થોય
શ્રી શત્રુંજયમંડળ, ઋષભ જિણંદ દયાલ,
મરુદેવાનંદન, વંદન કરું ત્રણ કાળ ;
એ તીરથ જાણી, પૂર્વ નવ્વાણું વાર,
આદિશ્વર આવ્યા, જાણી લાભ અપાર.. 1
ત્રેવીશ તીર્થંકર, ચઢીયા ઇણ ગિરિરાય,
એ તીરથના ગુણ, સુર અસુરાદિક ગાય ;
એ પાવન તીરથ, ત્રિભુવન નહિ તસ તોલે,
એ તીરથના ગુણ, સીમંધર મુખ બોલે… 2
પુંડરિકગિરિ મહિમા, આગમમાં પ્રસિદ્ધ,
વિમલાચલ ભેટી, લહીએ અવિચલ રિદ્ધ ;
પંચમી ગતિ પહોંચ્યા, મુનિવર ક્રોડાક્રોડ,
ઇણ તીરથ આવી, કર્મ વિપાક વિછોડ.. 3
શ્રી શત્રુંજય કેરી, અહોનિશ રક્ષાકારી,
શ્રી આદિ જિનેશ્વર, આણ હ્રદયમાં ધારી ;
શ્રી સંઘ વિઘનહર, કવડજક્ષ ગણ ભૂર,
શ્રી રવિબુધ સાગર, સંઘના સંકટ ચૂર… 4