Vanditu Sutra - વંદિતુ સૂત્ર (in Gujarati)

વંદિત્તુ સવ્વસિદ્ધે, ધમ્માયરિએ અ સવ્વસાહૂ અ;

ઇચ્છામિ પડિક્કમિઉં, સાવગ - ધમ્માઇ - આરસ્સ. ||1||

જો મે વયાઇયારો, નાણે તહ દંસણે ચરિત્તે અ;

સુહુમો અ બાયરો વા, તં નિંદે તં ચ ગરિહામિ..||2||

દુવિહે પરિગ્ગહમ્મિ, સાવજ્જે બહુવિહે અ આરંભે ;

કારાવણે અ કરણે, પડિક્કમે દેસિઅં સવ્વં. ||3||

જં બદ્ધમિંદિએહિં, ચઉહિં કસાએહિં અપ્પસત્થેહિં ;

રાગેણ વ દોસેણ વ, તં નિંદે તં ચ ગરિહામિ.. ||4||

આગમણે નિગ્ગમણે, ઠાણે ચંકમણે અણાભોગે ;

અભિઓગે અ નિઓગે, પડિક્કમે દેસિઅં સવ્વં. ||5||

સંકા કંખ વિગિચ્છા, પસંસ તહ સંથવો કુલિંગીસુ ;

સમ્મત્તસ્સ ઇઆરે, પડિક્કમે દેસિઅં સવ્વં. ||6||

છક્કાય - સમારંભે, પયણે અ પયાવણે અ જે દોસા ;

અત્તટ્ઠા ય પરટ્ઠા, ઉભયટ્ઠા ચેવં તં નિંદે.. ||7||

પંચણ્હમણુવ્વયાણં, ગુણવ્વયાણં ચ તિણ્હમઇયારે ;

સિક્ખાણં ચ ચઉણ્હં, પડિક્કમે દેસિણં સવ્વં.. ||8||

પઢમે અણુવ્વયમ્મિ, થૂલગ - પાણા - ઇવાય -વિરઇઓ ;

આયરિયમપ્પસત્થે, ઇત્થ પમાયપ્પસંગેણં … ||9||

વહ - બંધ - છવિચ્છેએ, અઇભારે ભત્ત - પાણ - વુચ્છેએ ;

પઢમ - વયસ્સઇઆરે, પડિક્કમે દેસિઅં સવ્વં … ||10||

Also Read: સંતિકરમ્ સ્તોત્ર – તૃતીય સ્મરણ

બીએ અણુવ્વયમ્મિ, પરિથૂલગ - અલિય - વયણ - વિરઇઓ ;

આયરિયમ - પ્પસત્થે, ઇત્થ પમાયપ્પસંગેણં … ||11||

સહસા - રહસ્સ - દારે, મોસુવએેસે અ કૂડલેહે અ ;

બીય - વયસ્સઇઆરે, પડિક્કમે દેસિઅં સવ્વં… ||12||

તઇએ અણુવ્વયમ્મિ, થૂલગ - પરદવ્વહરણ - વિરઇઓ ;

આયરિઅમપ્પસત્થે, ઇત્થ પમાયપ્પસંગેણં … ||13||

તેનાહડપ્પઓગે, તપ્પડિરુવે વિરુદ્ધગમણે અ ;

કૂડતુલ - કૂડમાણે, પડિક્કમે દેસિઅં સવ્વં … ||14||

ચઉત્થે અણુવ્વયમ્મિ, નિચ્ચં પરદાર-ગમણ - વિરઇઓ ;

આયરિઅમપ્પસત્થે, ઇત્થ પમાયપ્પસંગેણં… ||15||

અપરિગ્ગહિઆ ઇત્તર, અણંગ - વિવાહ - તિવ્વ - અણુરાગે ;

ચઉત્થ - વયસ્સઇઆરે, પડિક્કમે દેસિઅં સવ્વં … ||16||

ઇત્તો અણુવ્વએ પંચમમ્મિ, આયરિઅમપ્પસત્થમ્મિ ;

પરિમાણ - પરિચ્છેએ, ઇત્થ પમાયપ્પસંગેણં … ||17||

ધણ - ધન્ન - ખિત્ત - વત્થૂ, રુપ્પ - સુવન્ને અ કુવિઅ - પરિમાણે ;

દુપએ ચઉપ્પયમ્મિ ય, પડિક્કમે દેસિઅં સવ્વં … ||18||

ગમણસ્સ ઉ પરિમાણે, દિસાસુ ઉઢ્ઢં અહે અ તિરિઅં ચ ;

વુઢ્ઢી સઇઅંતરદ્ધા, પઢમમ્મિ ગુણવ્વએ નિંદે … ||19||

મજ્જંમિ અ મંસમ્મિ અ, પુપ્ફે અ ફલે અ ગંધ - મલ્લે અ ;

ઉવભોગ - પરિભોગે, બીયમ્મિ ગુણવ્વએ નિંદે… ||20||

Also Read: ઉવસગ્ગહરં સ્તોત્ર (ઉપસર્ગહર સ્તોત્ર)

સચ્ચિત્તે પડિબદ્ધે, અપોલ - દુપ્પોલિઅં ચ આહારે ;

તુચ્છોસહિ - ભક્ખણયા, પડિક્કમે દેસિઅં સવ્વં … ||21||

ઇંગાલી - વણ - સાડી - ભાડી - ફોડી - સુવજ્જએ કમ્મં ;

વાણિજ્જં ચેવદંત, લક્ખ - રસ - કેસ - વિસ - વિસયં … ||22||

એવં ખુ જંત - પિલ્લણ - કમ્મં નિલ્લંછણં ચ દવ - દાણં ;

સર - દહ - તલાય - સોસં, અસઇ - પોસં ચ વજ્જિજ્જા … ||23||

સત્થગ્ગિ - મુસલ - જંતગ - તણકટ્ઠે, મંત -મૂલ - ભેસજ્જે ;

દિન્ને દવ્વાવિએ વા, પડિક્કમે દેસિઅં સવ્વં… ||24||

ન્હાણુવ્વટ્ટણ - વન્નગ - વિલેવણે સદ્દ - રુવ - રસ - ગંધે ;

વત્થાસણ - આભરણે, પડિક્કમે દેસિઅં સવ્વં … ||25||

કંદપ્પે કુક્કુઇએ, મોહરિ અહિગરણ ભોગ - અઇરિત્તે ;

દંડમ્મિ અણટ્ઠાએ, તઇઅમ્મિ ગુણવ્વએ નિંદે … ||26||

તિવિહે દુપ્પણિહાણે, અણવટ્ઠાણે તહા સઇવિહૂણે ;

સામાઇઅ વિત્તહકએ, પઢમે સિક્ખાવએ નિંદે.. ||27||

આણવણે પેસવણે, સદ્દે રુવે અ પુગ્ગલક્ખેવે ;

દેસાવગાસિઅમ્મિ, બીએ સિક્ખાવએ નિંદે … ||28||

સંથારુચ્ચારવિહી, પમાય તહ ચેવ ભોયણાભોએ ;

પોસહવિહિ - વિવરીએ, તઇએ સિક્ખાવએ નિંદે… ||29||

સચ્ચિત્તે નિક્ખિવણે, પિહિણે વવએસ મચ્છરે ચેવ ;

કાલાઇક્કમદાણે, ચઉત્થે સિક્ખાવએ નિંદે … ||30||

Also Read: નમસ્કાર મહામંત્ર (નવકાર મહામંત્ર)

સુહિએસુ અ દુહિએસુ અ, જા મે અસ્સંજએસુ અણુકંપા ;

રાગેણ વ દોસેણ વ, તં નિંદે તં ચ ગરિહામિ … ||31||

સાહૂસુ સંવિભાગો, ન કઓ તવ ચરણ - કરણ - જુત્તેસુ ;

સંતે ફાસુઅદાણે, તં નિંદે તં ચ ગરિહામિ … ||32||

ઇહલોએ પરલોએ, જીવિઅ - મરણે અ આસંસ - પઓગે ;

પંચવિહો અઇયારો, મા મજ્ઝ હુજ્જ મરણંતે… ||33||

કાએણ કાઇઅસ્સ, પડિક્કમે વાઇઅસ્સ વાયાએ ;

મણસા માણસિઅસ્સ, સવ્વસ્સવયાઇઆરસ્સ … ||34||

વંદણ - વય - સિક્ખા - ગારવેસુ, સન્ના - કસાય - દંડેસુ ;

ગુત્તીસુ અ સમિઇસુ અ, જો અઇઆરો અ તં નિંદે …||35||

સમ્મ - દિટ્ઠી જીવો, જઇ વિ હુ પાવં સમાયરે કિંચિ ;

અપ્પો સિ હોઇ બંઘો, જેણ ન નિદ્ધંધસં કુણઇ … ||36||

તં પિ હુ સપડિક્કમણં, સપ્પરિઈઆવં સઉત્તર - ગુણં ચ ;

ખિપ્પં ઉવસામેઇ, વાહિવ્વ સુસિક્ખિઓ વિજ્જો… ||37||

જહા વિસં કુટ્ઠગયં, મંત- મૂલ - વિસારયા ;

વિજ્જા હણંતિ મંતેહિં, તો તં હવઇ નિવ્વિસં … ||38||

એવં અટ્ઠ વિહં કમ્મં, રાગ-દોસ-સમજ્જિઅં ;

આલોઅંતો અ નિંદંતો, ખિપ્પં હણઇ સુસાવઓ…||39||

કય - પાવો વિ માણુસ્સો, આલોઇઅ નિંદિઅ ગુરુ - સગાસે;

હોઇ અઇરેગ - લહુઓ, ઓહરિઅ - ભરુવ્વ ભારવહો… ||40||

Also Read:લઘુ – શાન્તિ – સ્તવન – સ્તોત્ર

આવસ્સએણ એએણ, સાવઓ જઇ વિ બહુરઓ હોઇ ;

દુક્ખાણમંતકિરિઅં, કાહી અચિરેણ કાલેણ… ||41||

આલોઅણા બહુવિહા, ન ય સંભરિઆ પડિક્કમણ - કાલે ;

મૂલગુણ - ઉત્તરગુણે, તં નિંદે તં ચ ગરિહામિ… ||42||

તસ્સ ધમ્મસ્સ કેવલિ - પન્નત્તસ્સ, અબ્ભુટ્ટિઓ મિ આરાહણાએ ;

વિરઓમિ વિરાહણાએ, તિવિહેણ પડિક્કંતો વંદામિ જિણે ચઉવ્વીસં… ||43||

જાવંતિ ચેઇઆઇં, ઉડ્ઢે અ અહે અ તિરિઅલોએ અ ;

સવ્વાઇં તાઇં વંદે, ઇહ સંતો તત્થ સંતાઇ. … ||44||

જાવંત કે વિ સાહૂ, ભરહેરવય - મહાવિદેહે અ ;

સવ્વેસિં તેસિં પણઓ, તિવિહેણ તિદંડ વિરયાણં … ||45||

ચિર સંચિય - પાવ - પણાસણીઇ, ભવ - સયસહસ્સ - મહણીએ ;

ચઉવીસ - જિણ - વિણિગ્ગય - કહાઇ, વોલંતુ મે દિઅહા… ||46||

મમ મંગલમરિહંતા, સિદ્ધા સાહૂ સુઅં ચ ધમ્મો અ ;

સમ્મદિટ્ઠી દેવા, દિંતુ સમાહિં ચ બોહિં ચ..||47||

પડિસિદ્ધાણં કરણે, કિચ્ચાણમકરણે પડિક્કમણં ;

અસદ્હણે અ તહા, વિવરીઅ - પરુવણાએ અ..||48||

ખામેમિ સવ્વજીવે, સવ્વે જીવા ખમંતુ મે ;

મિત્તી મે સવ્વ-ભૂએસુ, વેરં મજ્ઝ ન કેણઇ.. ||49||

એવમહં આલોઇઅ, નિંદિઅ - ગરહિઅ - દુગંચ્છિઅં સમ્મં ;

તિવિહેણ પડિક્કંતો, વંદામિ જિણે ચઉવ્વીસં.. ||50||

બૃહદ્ – શાંતિ – સ્મરણ (મોટી શાંતિ)

અજિત શાંતિ સ્તોત્ર – ષષ્ઠં સ્મરણ